Դիլիջանը ներառվել է Green Destinations Top 100 Stories 2026 հեղինակավոր միջազգային նախաձեռնության մեջ՝ ստանալով աջակցություն ծրագրի Fee Waiver Program-ի շրջանակում։ Համաշխարհային մրցակցային ընտրության արդյունքում ամբողջ աշխարհից ծրագրին մասնակցելու հնարավորություն է ստացել ընդամենը հինգ զբոսաշրջային ուղղություն, ինչը Դիլիջանի ընդգրկումը դարձնում է հատկապես նշանակալի և խորհրդանշական։ Այս ընտրությունը բարձր գնահատական է Դիլիջանի երկարամյա և հետևողական աշխատանքի համար՝ ուղղված կայուն զբոսաշրջության զարգացմանը, տեղական համայնքների ակտիվ ներգրավմանը, մշակութային և պատմական ժառանգության պահպանմանը, ինչպես նաև բնության վրա հիմնված փորձառությունների ձևավորմանն ու տարածմանը։ Դիլիջանը ներկայանում է որպես օրինակելի ուղղություն, որտեղ տնտեսական զարգացումը ներդաշնակորեն համադրվում է բնապահպանական պատասխանատվության և համայնքային արժեքների պահպանման հետ։ Հարթակում Դիլիջանը ներկայացվել է Meet Dilijan նախաձեռնության շնորհիվ։ Դիլիջանի ընդգրկումը Green Destinations Top 100 Stories 2026 հարթակում նշանակում է, որ քաղաքի փորձը, մոտեցումները և հաջողված մոդելները ներկայացվելու են միջազգային լսարանին՝ դառնալով ներշնչման աղբյուր այլ տարածաշրջանների համար։ Այս հարթակը միավորում է այն ուղղություններին, որոնք ոչ միայն գրավիչ են զբոսաշրջիկների համար, այլև իրական ազդեցություն ունեն շրջակա միջավայրի պահպանության, սոցիալական համերաշխության և տեղական տնտեսության կայուն զարգացման վրա։
Green Destinations Top 100 Stories նախաձեռնությունը համարվում է աշխարհի ամենահեղինակավոր հարթակներից մեկը կայուն զբոսաշրջության ոլորտում։ Այն նպատակ ունի հավաքել, գնահատել և ներկայացնել լավագույն փորձերը՝ հիմնված իրական արդյունքների, պատասխանատու կառավարման և երկարաժամկետ արժեք ստեղծելու սկզբունքների վրա։ Այստեղ ընդգրկվելը նշանակում է ճանաչում ոչ միայն բնական կամ մշակութային գեղեցկության, այլև ազդեցության, պատասխանատվության և համայնքային արժեքների համար։ Դիլիջանի ընդգրկումը այս ցանկում ևս մեկ անգամ հաստատում է քաղաքի դիրքը որպես միջազգային մակարդակով ճանաչվող ուղղություն, որը հետևողականորեն զարգանում է կայունության սկզբունքներով՝ պահպանելով իր ինքնությունը և բնությունը, միաժամանակ ստեղծելով որակյալ և արժեքավոր փորձառություններ այցելուների և տեղական բնակչության համար։ Այս ձեռքբերումը կարևոր քայլ է Դիլիջանի՝ որպես պատասխանատու զբոսաշրջության առաջատար կենտրոնի ճանաչման ճանապարհին և նոր հնարավորություններ է բացում միջազգային համագործակցությունների, փորձի փոխանակման և երկարաժամկետ զարգացման համար։
Աղբյուր՝ aravot.am